Вӱдыш пурен кайымаш шукемын
Вӱдыштӧ еҥ- влакын колымыштын тӱҥ амалже- влакым каласыме. Республикыштына шогышо чот шокшо игечылан кӧра, еҥ-влак утларак вӱд воктеке кошташ тӱҥалыныт. Идалык тӱналтыш гыч кундемыштына 24 еҥ вӱдыш пурен каен. Нунын коклаште нылытше йоча лийын. Таҥастарашлан: кодшо ийын 26 азапым регистрироватлыме. Тиде ойган статистикым Марий Эл Правительстве председательын алмаштышыже Степан Воронцовын правительствыште эртарыме брифингыште увертарыме. Мероприятийыште тыгак изи судно шотышто тӱҥ кугыжаныш инспектор Марина Смирнова ден Марий аварийно-утарыше службым вуйлатыше Алексей Беляев лийыныт. Воронцовын мутшо почеш, чыла азапшат йӱштылаш келыштарыдыме верлаште лийын, 80 процент кугыеҥже йӱшӧ вуя вӱдыш пурен. Еҥ- влак йӱштылмӧ верым шоналтен ойырен налыт гын, йоча- влакым тӱткыш деч посна огыт кодо гын, икымше полышым пуэн моштат гын, трагедий деч кораҥаш лиеш ыле. Республикыште йӱштылаш лийме верым ешараш шонымаш уло. Тидын нерген Республикым вуйлатышын эртарыме совещанийыште ойлымо. Тушто чыла муниципал районыштат йӱштылмӧ верым ышташ кӱштымӧ. Чарыме верлаште йӱштылшӧ- влакым рашемден шогат. Тыгай еҥ- влаклан иктат пеле гыч кок тӱжем теҥге марте штрафым тӱлыктат. Тымарте шым тагай протоколым возымо. Йӱштылаш пурымо деч ончыч шке тазалыкым аклен моштыман. Эҥгек лийын гын, полышым пуэн мошташ кӱлеш. А тидлан тунемаш курсыш кошташ, йодышым шкевуя шымлаш лиеш. Шкетын улмо годым йӱштылаш пураш, йоча- влакым эскерыде кодаш огыт темле, йоча- влакым ияш туныктыман.