Таче элыштына калыкым шотлымаш тӱҥалын

               Таче элыштына калыкым шотлымаш тӱҥалын. Теҥгече переписьлан ямдылалтме да тудым эртарен колтымо шотышто республикысе комиссийын заседанийже лийын. Тушто кугыжаныш кучемын мероприятийлан ямде улмыжым каҥашыме. Перепись эше кодшо ийынак лийшаш ыле, но пандемийлан кӧра тудым кок гана вес жапыш кусарыме. Тиде гана эпидемиологий сӱретым ончыде тудым эртарен колташ лийме. Возен налме участкыш, самоизоляцийым увертарыме гынат, 65 ияш деч кугурак- влакат миен кертыт, Куар код деч поснат мияш лиеш. Пандемийлан кӧра икымше гана перписьын цифран форматшым пуртымо. Тудын дене келшышын, шке данныйым Кугыжаныш полыш порталыште кодаш лиеш. Михаил Васютин туныктыш министерствылан илалше еҥ- влаклан интернет сервис дене пайдаланаш полшаш йодын. Тидымат палемдыме: Кугыжаныш полыш порталыште республикысе 406 тӱжем утла еҥ регистрироватлатын. Нуно электрон йӱклымаш дене пайдаланен кертыт. Маристатым вуйлатышын сомылжым шуктышо Инна Петрова ешарен: республикыште 206 участкым палемдыме да ямдылыме. Тушко мияш лиеш. Участке- влакын спискышт Маристатын, Правительствын, ола да район- влакын сайтыштышт вераҥдалтын. Участкылашке 8 шагат эр гыч 8 шагат кас марте мияш лиеш. Перепись 14-ше ноябрь марте шуйна. Мероприятий дене кылдалтше йодыш- влакым перепистын сайтыштыже але шокшо телефон линийын телефонжо дене рашемдаш лиеш. Номерже: 8 800 707 20 20.