Идалык тӱҥалтыш гыч республикысе корнылаште 55 еҥ ӱмыр лугыч лийын
Идалык тӱҥалтыш гыч республикысе корнылаште 55 еҥ ӱмыр лугыч лийын. МВД-н ГИБДД виктемыштыже тенийсе индеш тылзаш пашам иктешлыме. Марий Элыште ДТП-н да тушто ӱмыр лугыч лийше- влакын чотышт шагалеммаш палдырна. Тиде жапыште 496 ДТП-м регистрироватлыме. Тушто 662 еҥ эмганен. Туге гынат колышо- влакын чотышт ешаралтын- 55 еҥыш шуын. Тидыже ӱмашсе тыгаяк жап деч 4 процентлан шукырак. ДТП-н тӱҥ амалже- ваштареш корныш кудал лекмаш, скоростьын келшен толдымыжо шотлалтеш. Колышо еҥан куд ДТП йӱшӧ вуя руль воктеке шичмылан кӧра лийын. Йолешке- влак дене лийше корно азап 13 процентлан ешаралтын. Тыгайжым 127-ым регистрироватлыме. Тушто 13 еҥ колен да 100 утла еҥ эмганен. Совещанийыште тидымат палемдыме: ДТП-м ГИБДД сотрудник- влак полшымо дене гына огыл шижтараш лиеш, корным кузе кучымым терген шогымашат полшышаш. Индеш тылзыште кажне кокымшо корно эҥгекыште корнын ситыдымашыжым палемдыме. Тиде- разметкын начар коймыжо але укелыкше, волгыдо ситыдымаш, тротуарын укелыкше, телым начар эрыктымаш да молат. Тыгай ситыдымаш утларакше Йошкар-Ола ден Волжскышто вашлиялтеш. Лишыл жапыште корнышто аварийым шагалемдыме йодышым Правительство комиссийын заседанийыштыже каҥашаш палемдыме.
