Марий Элын автоледиже рашемын

                 «Марий Элын автоледиже» кубокым эн самырык участнице- Татьяна Соловьёва модын налын. Россий ДОСААФ-ын регионысо пӧлкаштыже кажне ийын ӱдырамаш водитель- влак коклаште эртарыме таҥасымашым иктешлыме. Тений тушко Йошкар-Ола, Юрино да Советский районла гыч 16 ӱдырамаш ушнен. Икымше верым Татьяна Соловьёва налын. Тыдо чыла йыжыҥымат чаплын эртен, корно правилым чаткан пала. Кокымшо верыш 10-шо номер дене таҥасыше Галина Исаева лектын. Кумшо вер Екатерина Поповалан логалын. Таҥасыше- влаклан наградым кучыктымаште ГИБДД-н пашаеҥже- влак да ГИБДД виктемым вуйлатышын сомылжым шуктышо, полицийын подполковникше Андрей Шабалин лийыныт.