Моркышто 35 ийлан икымше гана эмлыме верым олмыктат

             Моркышто 35 ийлан икымше гана эмлыме верым олмыктат. Рӱдӧ эмлыме верыште паша 2021-ше 2025-ше ийлаште тазалыкаралтышын икымше звеножым уэмдыме программе кышкарыште шукталтеш. Тымарте леведышым ачален пытарыме. Пытартыш 35 ийыште икымше гана капитально олмыктымо пашалан 22 миллион утла теҥге оксам ойырымо. Тазалыкаралтыш министерствыште ойлымо почеш, эше вӱд пучым да канализацийым уэмдаш кӱлеш. Икымше пачашыште окнам вашталтыме, вашке моло пачашыштат пластик окнам шындаш тӱҥалыт. Моркысо рӱдӧ эмлыме вер шкенжын 145 ияш лӱмгечыжым уэмдыме зданийыште вашлиеш. Чыла пашам декабрьлан мучашлышаш улыт.