Армий радамыш икымше тӱшка рвезе- влак октябрьын кокымшо пелыштыже каят

                  Армий радамыш икымше тӱшка рвезе- влак октябрьын кокымшо пелыштыже каят. Теҥгече журналист- влак республикысе сарзе комиссариатын, Следствий виктемын да ДОСААФ пӧлкан еҥышт дене вашлийыныт. Мутланымаш шыже призыв дене кылдалтын ыле. Пресс-конференцийым почшыла республикын сарзе комиссарже Юрий Аксёнов ушештарен: тудын республикыш толмыжлан ик ий эртен, тудо кумшо призыв камапанийым эртара. Кумытшат коронавируслан кӧра неле эпидемиологий жапыште эртат. Туге гынат, чер ваштареш кучедалмаш шке лектышыжым пуа, призыв кампаний жапыште ик призывникат, военкоматын ик пашаеҥжат коронавирус дене черланен огыл. Тенийсе шыжымсе призывыште 700 утла рвезым Вооруженный вий радамыш налме лиеш. Икымше тӱшкаже октябрьын кокымшо пелыштыже кая. Нуно касвел военный округышто службым эрташ тӱҥалыт. Ик рвезе альтернативный граждан службым ойырен налын. Шылын коштшо- влакат вашлиялтыт. Индеш тылзе жапыште кумло утла уголовный пашам тарватыме. Кодшо ийысе уголовный паша- влакым шотыш налын 33 еҥым судитлыме.
                   Фото: МариМедиа.