Озаҥ ола гыч рецидивистым Йошкар-Олаште судитлат
Озаҥ ола гыч рецидивистым Йошкар-Олаште судитлат. Тудым 8 ийлан петырен кертыт. Озаҥ ола гыч ик гана веле огыл судитлалтше еҥым шояк оксам шаркалымылан 8 ийлан эрык деч посна коден кертыт. Республикысе прокурорын алмаштышыже 37 ияш пӧръеҥ шотышто титаклыман иктешлымашым ыштен. Шолыштмылан, официальный документым пытарымылан да пуштмылан ик гана веле огыл мутым кучаш шогалыме еҥ ынде шояк оксам шаркалаш манын аралымылыан да кондымылан титаклалтеш. Кодшо ийын ноябрьыште тудо Ижевск олаште вич тӱжем теҥгеаш шояк оксам налын, пеленже арален да вара Марий Элыш кевытыште тӱлаш конден. Волжск оласе кочкыш сату кевытыште шоя окса дене тӱлен. Вес кечынже кевыт пашаеҥ- влак оксам шотлымышт годым верештыныт. Экспертиза оксан чын огыл улмыжым пеҥгыдемден. Тиде осал паша неле преступленийлан шотлалтеш. Тудлан 8 ий марте эрык деч посна коден кертыт. Уголовный пашам Волжск оласе судыш колтымо.