Марий Элысе илемым Татарстан дене у корно ушен
Марий Элысе илемым Татарстан дене у корно ушен. Марий Турек районышто калыкын тӱналтышыжлан полышым пуымо шотышто программылан кӧра Татарстанысе Арск район марте корным чоҥымо. Тушто кызытеш тыгыде кӱм шарыме. А тымарте тушто йолын кошташат, машина дене кудалашат ок лий ыле, поснак шошым да шыжым. Тудын корем лакылаже эсогыл кеҥежымат кошкен огытыл. Туге гынат, Мариец посёлко эре Татарстан дене кылдалт шоген, поснак Арск станций гоч шуйнышо кӱртньӧ корно дене. Но тиде кыл корно укелан кӧра кӱрылтын ыле манаш лиеш. А корнын кужытшо улыжат вич меҥге гына. Тушечын ик меҥгат пелыже Мариец посёлко гоч эрта. Эше 2017-ше ийыштак верысе калык пашам шке виктараш тӱҥалын. Шке окса кӱшеш грейдер дене тӧрленыт, корно тӱрышто пушеҥгым да кушкылым эрыктеныт, лаке-коремлаш рокым оптеныт, эсогыл корно йымач пучымат пыштеныт. Но толшо йӱр чыла пашам адакат лавыраш савырен. Вара верысе калык «Пошкудо- влак деке корно» проектым ыштен, конкурсышто сеҥышыш лектын. Тыге 2019-ше ий гыч икмыняр йыжыҥ дене тыгыде кӱан корным ыштыме. Арск район дене кыл уэш пеҥгыдемын.