Йошкар-Оласе Петров урем ден Ураев бульварыште корно паша мучашыш лишемеш

                 Йошкар-Оласе Петров урем ден Ураев бульварыште корно паша мучашыш лишемеш. Теве Петров уремын Интернационалист воин- влак урем деч Шернур тракт марте ужышыжым чоҥымым икмыняр микрорайонышто илыше- влак шукертсек вученыт. Подряд организаций тиде кӱлешан да кугу оксам йодшо объектым кодшо ийын ноябрьыште чоҥаш тӱҥалын ыле. Корным чыла кӱлешан инфраструктуро дене ыштыме: йӱр вӱд йогымо канализаций, теплоцентраль, вӱд пуч, очистной сооружений марте вӱдым йоктарен колтымо сеть, машинам шогалыме вер, уремым волгалтарымаш, газон да тулеч молат. Теве ынде эн вучымо жапше шуын: тротуарыш асфальтым шараш тӱҥалме. Вара урем корныштат у шартыш лиеш. А Ураев бульварыште корныш асфальтым оптат. Туштат чыла инфраструктурым ыштыме. Кызыт эн вучымо пашажым шуктат- асфальтым шарат. Ушештарена: корным чоҥымаш республикым социал-экономик велым вияҥдыме индивидуал программе кышкарыште шукталтеш. Окса федерал да республикысе казнала гыч ойыралтеш.
                    Йошкар-Ола администрацийын фотожо.