Авиакатастрофышто илен лекше землякна тӧрланаш тӱҥалын

                     Татарстаныште авиакатастрофыш логалше- влак коклаште Марий Элыште илыше еҥат лийын. Рушарнян пошкудо кундемысе Мензелинск ола лишне парашютист- влакым наҥгайыше куштылго моторан самолёт камвозын. Бортыштыжо 22 еҥ лийын: 20 еҥже интруктор да парашютист- влак да экипажын кок еҥже. Туткареш 16 еҥ колен, кудытшо илыше кодын.  Илыше- влак коклаште Марий Эл гычат пӧръеҥ уло. ДОСААФ пӧлкан уверже почеш, тиде- Денис Яковлев. Тудо 1980-шо ийыште шочын, спортсмен, парашютист, разрядник. Шӱдӧ утла гана парашют дене тӧрштылын. Спорт корныжым лач Мензелинскысе авиаций да спорт клубышто тӱҥалын. Профессийже дене юрист. Спорт дене Марий Элыштат, Татарстаныштат кылым кучен. Тазалыкше шотышто: тудо тӧрланаш тӱналын. Ончыч реанимацийыште лийын гын, кызыт тӱшка палатыш кусарышаш улыт.