Палыме мурызо — Россий тӱвыран сулло пашаеҥже

              Йошкар-Оласе Россий Армийын тӱвыра полатшын художественный вуйлатышыже Наталья Ковалевская Россий Федерацийысе тӱвыран сулло пашаеҥже лийын. Элысе тӱвырам да сымыктышым вияҥдымашке пыштыме кугу надыржым аклен, шуко ий тыршен ыштымыжым шотыш налын Россий Президентын Указше дене тудлан Россий Федерацийысе тӱвыран сулло пашаеҥже Чап лӱмым пуымо. Наталия Ковалевскаям эстрада мурым йӧратыше- влак сайын палат. Тудо шке жапыштыже чапланыше «Сувенир» ден «Мари» вокал да инструментал ансамбльлаште мурен. Ятыр мурыжо руш да марий йылме дене мемнан марий радион фондыштыжат аралалтеш.