Тений идалык мучашлан республикыште 575 у ясле верым ыштыме лиеш

               Тений идалык мучашлан республикыште 575 у ясле верым ыштыме лиеш. Республикын правительствыже калыкле проект- влакын мероприятийыштым шыҥдарымаште сайын пашам ышта, Юл кундем округыштат, Российыштат кӱкшӧ лектышым ончыкта. Тенийсе индеш тылзын лектышыже почеш ойырымо оксам кучылтмо, проектлан мероприятийыштым шуктыдымо лӱдыкшӧ лийын кертме нерген Александр Евстифеевын эртарыме Правительствын заседанийыштыже ойлымо. Промышленность, экономически вияҥмаш да торговля министрын алмаштышыже Михаил Полубарьев палемден: контарктым 93 утла процентлан ыштыме. Шушаш да 23-шо ийланат контракт чолган ышталтеш. Корно паша дене шушаш ийлан 100 процент, 23-шо ийлан 64 процентым ыштыме. Регионысо проект- влакым шыҥдараш тенийсе тичмаш лимит деч  8 миллиардат 500 миллион теҥгем ойырымо. Тидыже 73 процент лиеш. Округышто тиде  эн сай показатель. Тений 22 у объектым пашаш колтышаш улыт гын, 13-шо пашам ышташ тӱналын. Идалык мучаш марте 8 объект ямде лийшаш, эше кум объект 75 процентлан ямде. Республикыште тений 85 кумдык тӱзландаралтеш. Тушеч 82-шо ямде. Тиде ийын вич тӱжем утла аварийный илыме верым кораҥдыме да 522 еҥым у пачерыш кусарыме. Идалык мучаш марте палемдыме показатель тӱрыс шукталтшаш. Йоча сад, школ- влак чоҥалтыт. Тений идалык мучаш марте 575 у ясле вер почылтшаш.  Марий Элым вуйлатыше проект почеш ойырымо оксам пеҥгыдын терген шогаш кӱлеш манын. Нуно илышын чыла кӱлешан шӧрынжым авалтат- тазалыкаралтыш, шинчымашым налмаш, демографий, корно да моло пашамат.