Рушарнян Ачан Российысе кечыжым палемдат

               Ачан тӱнямбал кечыжым витле утла элыште шӱдӧ ий утла июньын кумшо рушарнянже палемдат. Российланат тудо у пайрем огыл. Ончыч тудым 15 регионышто тӱрлӧ кечын палемдыме ыле. Ынде Россий Президентын Указше дене Пӱтынь Российысе Ача кечым официально пеҥгыдемдыме. Тудым октябрьын кумшо рушарнянже, тений 17-ше октябрьыште, палемдаш тӱналына. Тиде кечым таклан огыл ойырен налме. Октябрьыште кугу князь Дмитрий Иванович Донскойым чапландарат. Тудо элна верч чот шоген, Куликово кучедалмаште сеҥымашым конден, патырлыкым ончыктышо, ешыште ӱшанле да келшен илыше, Евдокия пелашыже дене 12 йочам ончен- куштышо семын палыме. Тиддеч посна ме ноябрьыште Аван кечыжым палемдена. Ачан Российысе кечыжым палемдыме лӱмеш Россий ӱдырамаш- влак ушемын регионысо пӧлкаже онлайн саламлымаш акцийым эртара. Тудын лӱмжӧ «Всем чудесным папам на свете- спасибо за всё!». Акцийыш ушнашлан кеч-могай социал сетьыште саламлымаш семын ачан але еш дене войзалтме фото сӱретым вераҥден шке постым возыман, саламлыме шомакым ойлыман да  «День отца2021», «Союзотцов», «СоюзженщинРоссии», «СЖРМарийЭл» хештегым ончыктыман.