Марий Эл инфраструктурылан бюджет кредитым налашлан инфраструктура проект- влакым ойырен налмашке ушнаш ямде

               Марий Эл инфраструктурылан бюджет кредитым налашлан инфраструктура проект- влакым ойырен налмашке ушнаш ямде. Таче Марий Элым вуйлатыше Александр Евстифеев Россий Федерацийыште регионлам вияҥдыме Правительство комиссий Президиумын заседанийыштыже участвоватлен. Тудым регионлам вуйлатыше- влак дене Россий Правительство Председательын алмаштышыже Марат Хуснуллин видеоконференц кыл йон дене эртарен. Каҥашыме тӱҥ йодыш инфраструктурылан бюджет кредитым налашлан инфраструктура проект- влакым ойырен налме дене кылдалтын. Шукерте огыл эртыше совещанийыште Правительство вуйлатыше Михаил Мишустин палемден ыле: тыгай кредит- влак йодмаш дене пайдаланат да нине окса регионлам умбакыже вияҥдаш стимул лийыт манын ӱшаным каласен. Каҥашыме моло йодыш гыч эше иктыже - корным чоҥымаш. Российысе субъект- влак коклаште 12-шо октябрьлан шотлымаште корно паша дене Марий Эл нылымше верым айла, «Йӧнан оласе кумдыкым ыштымаш» федерал проектым шыҥдарымаш дене- 14 –ше верым. «Юл эҥерым тазаҥдымаш» да «Ару вӱд» проектла дене икымше да 13-шо верым налеш. Шке оксам пыштен илыме верым чоҥышо- влакын праваштым пӧртылтымӧ дене 20-шо верыште улеш, Илыме верлан ипотеке кредитым августышто налме дене 36-шо вер, йӧнан оласе кумдыкым ышташ конкурсым шыҥдарыме дене тыгак 36-шо вер. Российыште корно пашалан 2021-ше 2023-шо ийлан контрактым ыштыме да оксам ойырымо дене 41-ше верым айла. Тидыжым регионлан «ужар» зона семын палемдыме.