Тений промышленный производство дене Марий Эл кумшо верыш лектын
Тенийсе вич тылзын лектышыже почеш промышленный производство дене Марий Эл Юл кундем округышто кумшо верым налын. Статистикын ончыктымж почеш республикына пытартыш ийлаште округышто ончыл кундем- влак радамыште улеш. А ял озанлык элна мучкат ӱшанлын ончыко кая. Вич тылзыште промышленный производствын индексше 4 тичмашат 3 луаш процентлан кушкын. Тидыже округышто кумшо лектыш. Чоҥымо комплексат кушкеш. Пашан кугытшо кум миллиардат 700 миллион теҥгеш шуын. Тидыже кодшо ийысе дене таҥастарымаште 111 процент утла лийын. А ял озанлыкыште шуктымо сомыл нерген ойлымо годым палемдаш кӱлеш: кодшо ийын республикысе агропром ятыр ийлан икымше гана округышто икымше верыш, Россий мучко нылымше верыш лектын ыле. Тыште производствын индексше 115 процент деке лишемын. Ончыко кайымаш шурно лектыш, шӧр лӱштыш, шылым ыштен налмаш, переработко дене палдырнен. Валовый продукцийын кугытшо 41 миллиард теҥгем эртен.