Корта ял кундемыште верланыше ече-роллер трассым капитально олмыктат

Йошкар- Ола воктенысе Корта ял кундемыште верланыше ече-роллер трассым капитально олмыкташ шонат. Кызыт тудын асфальт шартышыже пеш ок куандаре. Контрактым пеҥгыдемдымеке, пашам кумло кечыште ыштен шуктышаш улыт. Ече трассыште да «Виктория» олимпий резерв спорт школын ече база кундемыштыже у асфальтым шараш республикын бюджетше гыч 11 миллион наре теҥге окса ойыралтеш. Кодшо ийын сентябрьыште тиде кундемыште светодиодан лампе- влакым вераҥдыме ыле. Тунам Александр Евстифеев корно воктелсе пушеҥе- влакым кораҥдаш, парковкым кумдаҥдаш да изи ужалкалыме вер- влакым ышташ кӱштен ыле.