Шым самырык еҥ шке пачеран лийын

Медведево районышто тулыкеш кодшо йоча- влак у пачерыш илаш куснаш ямдылалтыт. Шке жапыштыже ача-ава полыш деч посна кодшо 7 еҥ теҥгече шке пачеран лийын. Районысо Сурок посёлкышто чоҥымо у пӧртысо пачерла деч сравочым республикым вуйлатыше Александр Евстифеев кучыктен. Илыме вер илаш пураш тӱрысынек ямде. Сантехнике ден кухньыш плитам вераҥдыме, пластик окна ден кӱртньӧ омсам шындыме. Пӧрт воктене спорт да йоча площадке уло, корно ден тротуар- влакым чаткан ыштыме. Республикым вуйлатыше у пачер оза- влакым куанле тат дене саламлен да тыгай пашан кӱлешлыкшым палемден. Кажне ийын пуымо пачерын чотшо кушкын толеш. Тиде паша Россий президент ден правительствын полшымышт дене шукталтеш. Район администрацийым вуйлатыше Денис Окуловын мутшо почеш, пытартыш вич ийыште у пачер деч шӱдӧ сравочым кучыктымо. Кодшо ийын Сенькан ялыште 39 пачеран посна пӧртым нӧлтымӧ. Республикым вуйлатыше у пачер оза- влак дене пырля илыме верым ончен савырнен да нунылан пиалан илышым тыланен. Тений гына республикыште 198 самырык еҥлан илыме вер йодышым виктарен колташ полшымо. Медведево районышто идалык мучаш марте эше 16 пачерым налын пуымо лиеш.