Пӱяшке лавыра вӱд йога

Куженер районышто илыше- влак плотинаште вӱдын амыргымыжлан кӧра тургыжланат. Ӱштымбал ден Йорош ял коклаште верланыше сурткайык вӱта воктенысе «Акашево пӱя» манме вер урлен да погынышо лавыраже Одобеляк ялысе плотина марте йогаш тӱналын. Тыге вӱдым чылт амыртен. Ынде тудым вӱд манашат ок лий. Тидын нерген шукын ойлат. Верысе кучем объектым эре терген шога гын, тыгай эҥгек ок лий ыле маныт.  Тиде лавыра йӱр вӱд дене пырля плотинаш умбакыжат йогаш тӱналеш да Куженер посёлко могырышкат шуйнен кертеш. Пӱртӱс поянлык министерствыште тиде экшыкым контрольыш налыныт. Тергыме пашам кугыжаныш экологий контроль пӧлка шукта.