«Акпарсын мландыжым чапландарена»
Курык марий кундемысе Виловат селаште курык марий- влакын «Акпарсын мландыжым чапландарена» лӱман 15-ше спорт фестивальышт эртен. Тушко ял илемлан командышт ушненыт. Погынышо- влакым район администрацийым вуйлатыше, тудын алмаштышыже-влак саламленыт. Таҥасымаш куштылго атлетике, шахмат, мини-футбол, волейбол, армспорт, кирам нӧлтымаш, эстафета, кандырам шупшмаш дене лийын. Лу ял илемын командыже- влак коклаште икымше верым Красноволжский илемын командыже сеҥен налын. Кокымшо верыш Виловатын, кумшыш Пайскырык илемын командыже лектыныт. Фестивальыште кажне ийын илем администраций вуйлатыше- влак коклаштат спартакиада эрта. Тиде гана 8 вуйлатыше ГТО нормативым сдатлымашке ушнен. Икымше верыш Пайскырык гыч Владислав Опалев лектын, кокымшо верым Усола гыч Людмила Баландаева налын. Кумшо вер дене Эман гыч Николай Ашпатровым палемдыме. Спорт пайремым концерт, дискотека да тулсавыш мучашленыт.
