Марий Элыште йытыным ончен-куштышо- влаклан полшышо программым ямдылат
Марий Элыште йытыным ончен-куштышо- влаклан полшышо программым ямдылат. Теҥгече программым ыштыме нерген Марий Элым вуйлатыше Александр Евстифеевлан ял озанлык да кочкыш сату министр Александр Гречихо ойлен. Сентябрь мучашлан концепций ямде лийшаш,- манын каласен. Но республикым вуйлатыше тиддене келшен огыл да тыге умылтарен: Сентябрьыште правительствын экономик блокшо шушаш ийын бюджетше дене пашам ышташ тӱналеш. Сентябрь мучашлан гына программе дене толыда гын, йытыным ончен-куштышо- влаклан шушаш ийлан иктаж-мом шонен лукташ йӧсӧ лиеш. Специалист-влакым техникым, нӧшмым налме, перерабатыватлыме да ужалыме йодыш тургыжландараш тӱҥалеш. Нунылан полыш кӱлеш. Ме тидым шке жапыштыже ыштышаш улына. Сандене пашам писынрак шуктыман. Тылзе жапыште программым да концепцийым каҥашаш кӱлеш. Республикым вуйлатыше тыгак йытыным погышо да перерабатыватлыше техникым ситарыме нерген ойлен. Тыгак ешарен: Марий Эл правительствын йытын комплексым вияҥдыме шотышто пашажым Российысе ял озанлык министерствыште сай могырым палемденыт. Республикыштына тений тиде кушкылым 906 гектареш вераҥдыме. Тыгак республикым вуйлатыше ден министр ял озанлыкыште кызыт могайрак сӱрет, кургым шапашлыме, шурным погымо, вольык озанлык, чыве муным да шылым ыштен налме нерген ойленыт.
