Вашке у тунемме ий тӱҥалеш

У тунемме ий тӱҥалме марте жап шукат ок код. Йошкар- Олаште кажне ийын эртарыме школ пазар почылтын. Тудо молгунамсе семынак рӱдӧ рынкыште верланен. Кызыт тыгак школ- влакын тунемме ийлан ямде улмыштым тергат. Ведомство- влак кокласе комиссий 205 школым ончен лектын. Тидыже 82 процент лиеш. 8 муниципал образованийыште тунемме тӧнеж- влакым приниматлен пытарыме. Тений 253 школ пашам ышташ тӱналеш. Тушто 79 тӱжемат 400 утла йоча тунемаш ямдылалтеш. 222 школышто ик смене дене тунемыт гын, 31 школышто кок смене дене кошташ тӱналыт. Профилактик мероприятийым 89 процентлан шуктымо. Кызыт южо вере леведыш олмыкталтеш, котельный, тепловой узел- влакым ямдылат, инженер коммуникацийым ачалат. Волгалтарыме системат тергалтеш. Кочмывер- влак материально- технически пойдаралтыт, тунемше- влакым пукшымо сомылым саемдаш тыршат. Медицина кабинет- влакымат олмыктат. Тунемаш тӱҥалме деч ончыч медицина пашаеҥ- влак дене совещанийым эртарат. Тӱрлӧ черым шижтарыме нерген ойлат.