Шереметевмыт замкын шагатшылан «чоным пуртеныт»
Юрино посёлкысо Шереметевмыт замкын шагатан башньыже, шӱдӧ ий эртымеке, уэш йӱкым пуаш тӱналын. Ынде 8 шагат эр гыч 21 шагат кас марте кажне 60 минут еда башньысе шагат жапым ушештара да «Коль славен наш Господь» гимным йоҥгалтара. Лач тиде сем шӱдӧ ий ожнат йоҥгалтын. Тиде жапым верысе калык моткоч вучен да тудо районын 95 ияш лӱмгечыжлан чапле пӧлек лийын. Тиде гимным 1794-ше ийыште композитор Дмитрий Бортнянский ден поэт Михаил Херасков возеныт. Тудо Россий империйын «Боже, царя храни» официальный гимнжым пеҥгыдемыме марте тыглай гимнжылан шотлалтын. Тидыжат оҥай: 1856-шо гыч 1917-ше ий марте Москосо кремльын Спасский башньысе курантше лач «Коль славен» гимным шоктен.