«Сеҥымаш аллейым» тӱзландарат

Йошкар- Ола воктелсе Семёновка селаште верысе калыкын тӱҥалтышыжлан полшымо проект почеш «Сеҥымаш аллейым» тӱзландарыме лиеш. Тушто канаш да пайрем, торжественный мероприятий- влакым эртараш йӧн лиеш. Аллей Василий Архипов лӱмеш школ ончылно верлана. Кызыт тушто паша умбакыже шуйна: брусчаткым шарыме лиеш, Совет Ушемын Геройжо, Данилово ялыште шочшо Василий Архиповын бюстшо вераҥдалтеш, теҥгыл, урно, понар- влак да савар лийшаш улыт. Тоштемше кушкыл- влакымат вашталтат, туя пушеҥгым шындат.