Козьмодемьянскыште парк уэмеш

Республикысе ик эн тошто олаште, Козьмодемьянскыште, «Оласе йӧнан илыме кумдыкым ыштымаш» программе кышкарыште оласе паркым олмыкташ тӱҥалме. Лихачёв уремыште верланыше паркыште реконструкцийым ыштат. Тиде сомыллан верысе калык эн шуко йӱкшым пуэн ыле. Кызыт паркыште чыла гаяк пушеҥгым пӱчмӧ. Молан манаш гын, экспертизын ончыктымыж почеш, нунын кӧргышт чылажынат шӱйшӧ улыт, кеч-могай мардеж годымат сӱмырлен кертыт. Тошто пушеҥге олмеш пистым, ваштарым, пызлым, кожым, пӱнчым, сиреньым да кушкыл- влакым шындаш палемдыме. У паркыште модмо да спорт комплекс- влак лийыт, еш дене каныме вер, тротуар, волгалтарыше лампе- влак вераҥдалтыт.