Изи Корамасыште кугу таул осалланен

Марий Элым вуйлатыше Александр Евстифеев Морко районысо Изи Корамас ялыш миен. Эртыше каныш кечылаште мардеж талышнымылан кӧра тушто 7 пӧрт эҥгекыш логалын. Иктыштыже огыт иле. Республикым вуйлатыше нине  пӧртлаште илыше- влак дене вашлийын да районым вуйлатыше- влак дене эҥгекыш логалше- влаклан полышым пуымо да ыштышаш паша нерген мутланен. Ялыштак район администрацийым вуйлатыше Александр Голубков умылтарен: йодыш виктаралтеш да арня мучаш марте тудым кораҥдаш палемдыме. Верысе калык «вес кугу йӱр толмешке, кучем чыла олмыктен ок шукто» манын тургыжланымашым каласен. Сандене Александр Евстифеев кӱчык жапыште чыла ыштен шукташ кӱштен. Вашлиймаш деч вара Республикым вуйлатыше район администрацийыште совещанийым эртарен. Туштат Изи Корамас ялысе экшыкым кораҥдыме нерген мутланыме. Тыгак ик ӱдырамаш пелашыжлан Йошкар-Олаште медицина полышым пуаш кӱлеш манын йодын. Евстифеев Александр Голубковлан тиде йодмашлан полшаш кӱштен. Таул мардежын кышажым кораҥдыме пашам республикысе кучем контрольыш налын.