Ий фигуро- влак оласе калыкым да уна- влакым куандараш тӱҥалыт
Йошкар-Олан мэрийже шушаш вӱргечын Ленин площадьыште ий городокым почаш шона. Тыге лишыл жапыште ий фигуро- влак оласе калыкым да уна- влакым куандараш тӱҥалыт. Кугарнян пытартыш тӱшка ийым кондымо. Йӱштӧ кече шогымылан кӧра паша изиш кучалтын. Сандене кызыт специалист- влак 29-ше декабрьлан шукташ манын чот тыршат. Но осал шонымашан- влак ыштыме икмыняр фигурым пудыртен коденыт, нуным уэш ышташ кӱлеш, а тидлан жап кая. Чаманаш логалеш, тыгай еҥ- влак вес еҥын пашажым огыт акле, а нунылан кок пашам ышташ верештеш.