Таче Российын Президентше Владимир Путинын 17-ше пресс-конференцийже эртен
Таче Российын Президентше Владимир Путин пресс-конференцийым эртарен. Тудын дене вашлиймашке 500 журналистым ӱжмӧ. Нунын кокла гыч пелыже регионласе СМИ гыч улыт. Кугу пресс-конференций 17-ше гана эртен Ончычсо 16 вашлиймашыште журналист- влак Президентлан тӱжем утла тӱрлӧ йодышым пуэныт. Тиде гана Марий Эл гыч Президент дене вашлиймашке «Марийская правда» газетын корреспондентше Анастасия Петрова миен. Тыгай вашлиймашыште тудо нылымше гана лийын да таче пиал шыргыжалын. Тудо Элым вуйлатышылан шке йодышыжым пуэн. Анастасия Петрова ушештарен: элым вуйлатыше шушаш ийым калык сымыктыш да калык- влакын нематериальный тӱвыра поянлыкыштын идалыкше семын увертарен. Сандене калык промысел нерген законыш калык сымыктышым вияҥдаш полышым пуымо нерген ешартыш кӱлеш. Президент палемден: калык промысел шотышто решений- влак образований аланыште пеҥгыдемдалтыныт. Но ситышын ыштыме огыл, очыни. Марий Эл да воктелсе кундем- влак шке семын ойыртемалтше улыт. Нуно ончычсо тукым деч куснышо поянлыкым переген аралат. Мутат уке, тидлан полшымо шуэш. Журналист Йошкар-Олам кӱртньӧ корно дене Моско деч посна моло ола- влак денат ушаш кӱлеш манын. Владимир Путин тиде йодышым кӱлешанлан шотлен да Россий кӱртньӧ корным вуйлатыше дене мутланаш да кӱштымашым пуаш сӧрен. Тиде йодышым виктарен колташ лиеш манын.
