Александр Евстифеев Республикысе правительствын тенийсе паша лектышыже нерген докладым ыштен
Александр Евстифеев Республикысе правительствын тенийсе паша лектышыже нерген докладым ыштен. Конгресс- влак полатыште Марий Эл Правительствын кумдаҥдыме заседанийже лийын. Мероприятийыште сенатор Сергей Мартынов, Кугыжаныш Погынын депутатше- влак, кугыжаныш кучем органлан еҥышт, суд- влакым, муниципал район да ола округ- влакым вуйлатыше-шамыч, юмынйӱлан, СМИ-н, мер организацийлан еҥышт лийыныт. Республикым вуйлатыше эн ончыч калыкле проект- влакым, республикым вияҥдыме индивидуал программым шыҥдарыме нерген ойлен. Элым вуйлатышын шындыме задачым республике сайын шуктен толеш. Отрасль- влак могырым правительствын пашажым ончалме годым Александр Евстифеев эн ончыч экономик показательым палемден. Кугыжаныш парымым ик миллиардат 400 миллион теҥгелан шагалемден кертме. Тыге тудо 2017-ше ий гыч кум миллиардлан иземын. Правительствын резерв фондшо гыч тӱрлӧ кӱлешлыклан, чер ваштареш кучедалаш 185 миллион теҥгем ойырымо. Бюджет социал корныжым арален кода- 62 утла процентше социал сферыш колталтеш. Чоҥымо пашаште, газым пуртымаште, корно озанлыкыште, ял озанлыкыште, туныктымо пашаште, тазалыкаралтышыште сай лектышым ончыктымо. Мучашлан республикым вуйлатыше погынышо- влакым шушаш У ий дене саламлен да шке пашаштышт сай сеҥымашыш шушо- влаклан Россий Федерацийын да Марий Элын Кугыжаныш наградыштым кучыктен. Теве противотуберкулёз диспансерын пӧлкажым вуйлатыше Валентина Эренберг «Россий Федерацийын сулло врачше», Россий Армий Тӱвыра полатшын художественный вуйлатышыже Наталия Ковалевская «Россий тӱвыран сулло пашаеҥже», Полупроводник прибор- влак заводын конструктор пӧлкажын группыжым вуйлатыше Елена Смовдаренко «Российын сулло машиностроительже» лийыныт. Иштрикова лӱмеш «Канде кайык» гимназийын туныктышыжо Ксения Ушакова Россий президентын Почётан Грамотыжо дене палемдалтын. «Марий Эл ончылно надырлан» кокымшо степенян орденым сенатор Сергей Мартыновлан, Тиде орденын медальжым журналист Владимир Марышевлан кучыктымо.