Полпред пеленсе Советын пашаче группыжо йоча спортым вияҥдыме йодыш дене погынымашым эртарен

Теҥгече видеоконференций йӧн дене Россий Президентын Полномочный представительже пеленсе Советын пашаче группыжын «Юл кундем округышто йоча ден самырык- влакын тӱшка спортыштым да физический культурым вияҥдымаш» йодыш дене икымше заседанийже эртен. Тудым полпредын алмаштышыже Олег Машковцев ден Самара областьын губернаторжо Дмитрий Азаров эртареныт. Пашаче группыш округысо чыла кундемын еҥышт, Федераций Советын да Кугыжаныш Думын, Российысе просвещений министерствын, спорт организаций- влакын еҥышт пуреныт. Машковцевын мутшо почеш, Советын темыже пеш кӱлешан. Самырык тукымым таза илыш йӱла, спорт да физический культура деке ушымо кугу тӱшка йодышым виктарыман. Тушко кадр йодышат, инфраструктурым ыштыме пашат пурат. Пашаче группо регионлаште йоча да самырык- влаклан спортын кузе вияҥмыже шотышто уверым поген, лончылышаш улеш. Советын заседанийже февральыште Самара областьыште эртышаш.