«Марла чын возена» диктант 7-ше гана эрта
Марий тиште кече пайрем радамыште эрла «Марла чын возена» 7-ше диктант лиеш. Тудым Марий Кугыжаныш университет тӱвыра, туныктыш министерстве- влак дене пырля эртара. Диктантым возаш школлаште тунемше да туныктышо, методист, воспитатель, студент, вузлан туныктышо ден пашаеҥышт, шанче, тӱвыра пашаеҥ, журналист, кугыжаныш да муниципал служащий да чыла кумылан- влак ӱжалтыт. Мероприятий МарГУ-н тӱвыра институтыштыжо (Кремль урем, 44-ше пӧрт) да Республикысе мер-политик рӱдерыште, Гагарин проспектысе 8-ше пӧртыштӧ лиеш. Тиддеч посна марла чын возен моштымыштым Российысе моло кундемыштат да да йот эллаштат тергат. Возымаш 10 шагатлан тӱҥалеш.