Республикысе кум еҥ Россий МЧС-ын медальже дене палемдалтын

Марий Элысе МЧС виктемыште Россий МЧС-ын эртарыме «Созвездие мужества» 11-ше фестивальжын республикысе йыжыҥыштыже сеҥыше- влакым саламлыме торжественынй церемоний эртен. Погынышо- влак профессионал мастарлык конкурсышто сеҥыше- влакым да Киров областьыште спорт туризм да кычал- утарыме паша шотышто «Вятский лось» виш чемпионатыште специализированный пожар да утарыше частьын «Йошкины коты» командыжым, нуным ямдылымаште тыршыше специалист- влакым шокшын саламленыт. Поснак кугу тӱткыш патырлыкым ончыктышо- влак деке лийын. Еҥ- влакым утарыме годым лӱддымылыкым, патрылыкым да куатым ончыктымылан Россий МЧС-ын «За содружество во имя спасения» медальжым Максим Гуляевлан, Пётр Стрельцовлан да Павел Целиковлан кучыктымо. Январьыште кум йолташ йӱлышӧ пӧрт гыч вич йочам утареныт. Пожарный- влак толмеш нуно эше шикшан пӧлемла гыч погым луктедаш полшеныт. Тыгак пожарыште шкеныштым чолган кучымылан Марий Элысе МЧС виктемым вуйлатышын тауштымашыж дене Данил Скобелев, Роман Смирнов да Виктор Киселёв палемдалтыныт. Майыште нуно посна озанлыкын йӱлаш тӱналше саваржым мо уло тудын дене йӧрташ тӱналыныт да илыме пӧртым, пошкудо участке- влакым, погым кугу тул шарлыме деч утарен коденыт.