Россий президентын полномочный представительже Игорь Комаров округысо 21 еҥлан Кугыжаныш наградым кучыктен

Теҥгече Юл кундем округышто Россий президентын полномочный представительже Игорь Комаров округысо 21 еҥлан Кугыжаныш наградым кучыктен. Тудо палемден: наградитлымаш Конституций кече вашеш эрта. Тидым сулен налше еҥ- влакым саламлымаш пайремын ик йӱлашкыже савырнен. Палемдыме еҥ- влак коклаште тӱрлӧ вере пашам ыштыше- влак улыт: промышленный предприятийлаште, транспортышто, тӱвыра ден сымыктышыште, социал да финанс сферыште, кугыжаныш служащий, туныктышо, врач, шуко шочшан ача-ава- влак. Уло чон дене сулен налме награде дене саламлем, тиде кугу чап, - каласен Игорь Комаров. Шуко шочшан еш- влак коклаште вигак кок ешым «Родительская слава» орден дене палемдыме. Иктыже Пермь край гыч индеш шочшан еш, весыже Марий Элысе Шернур район гыч шым икшывым куштышо Сергей ден Татьяна Шабдаровмыт. А «Шернур сырзавод» директорын алмаштышыже Владимир Кожанов «За заслуги перед Отечеством 2 степени» медаль дене палемдалтын. А Георгий Константинов лӱмеш руш академический драма театрын артисткыже Наиля Сулейманова тӱвырам да сымыктышым вияҥдымашке пыштыме надырлан «Россий Федерацийын сулло артистше» Чап лӱмым налын. Кугыжаныш награде- тиде тендан сеҥымашдам аклымаш, пашаланда да талантланда, Российым пеҥгыдемдымашке пыштыме кугу надырланда тауштымаш,- каласен Игорь Комаров да тазалыкым, пиалым, улан илышым, Отечество верч шуко ий тыршаш тыланен.