Теҥгече Российыште Палыдыме салтакын кечыже палемдалте

Теҥгече Российыште Палыдыме салтакын кечыже палемдалте. Тудо кугу сар годым вуйым пыштыше, лӱмышт палыде кодшо воин- влакын подвигыштым, чапыштым, патырлыкыштым шарнымашеш кодаш полшышаш. Палыдыме салтакын кечыже- мландыште кызытат палыдыме семын кийыше салтак- влакым шарныме да пагалымашым ончыктымо кече. Кычалше отряд- влак кажне ийын шӱдӧ, тӱжем дене лӱмдымӧ красноармеец- влакын капыштым муыт. Теҥгече моло верысе семынак, Советский посёлкысо рӱдӧ площадьыштат Чап монумент воктене «Шарнена, аклена, кугешнена!» акций эртен. Тушко муниципал районым вуйлатыше Сергей Халтурин, районын сарзе комиссарже Владимир Лебедев, районысо предприятий ден организацийлан еҥышт, йоча сад, школла гыч ӱдыр-рвезе- влак да верысе калык погынен. Нуно вуйым пыштыше- влакым ик тат шып шоген шарналтеныт да курымашлык тул воктеке пеледыш аршашым пыштен, вуйым савеныт.