Ял озанлыкыште тыршыше самырык специалист- влаклан ик гана тӱлымӧ оксам кугемдат

Ноябрь мучашыште Марий Эл Кугыжаныш Погынын визымше бюджет сессийже пашам ыштыш. Тушто ик йодыш семын «Ял озанлыклан кугыжаныш велым полшымаш» законыш тӧрлымашым пуртымо. Тудын дене келшышын, «Ял кундемлам комплексно вияҥдымаш» кугыжаныш программе почеш ял илем- влакын бюджетыштлан субсидий да ял кооперацийым вияҥдаш да фермер озанлык- влаклан полшаш субсидий ойыралтшаш. Пайдаже шагаллан кӧра, ял озанлыклан полшымо мера гыч самырык специалистлан лӱман стипендийым да окладышкыже ешарен тӱлымашым кораҥдыме. Тудын олмеш ял озанлык министерстве ялышке илаш куснышо да ял озанлык предприятий дене паша шотышто ойпидышым кылдыше самырык специалист- влаклан ик гана тӱлымӧ оксам 69 гыч 100 тӱжем теҥге марте кугемда. Южо категорий еҥ- влаклан эше ик социал полыш семын ялысе школлаште ыштыше- влаклан шуко пачеран пӧртлаште тӱшка погым капитально олмыктымылан тӱлымӧ роскотым икымше январь гыч тӱрысынек пӧртылташ тӱналыт.