Верласе сар- влаклан пӧлеклалтше шарнымаш-концертыш ӱжыт

Йошкар-Оласе самырык- влакын полатыштышт 8-ше декабрьыште 16 шагатлан Афганистаныште сар тӱҥалмылан 40 ий да Чечняште сар тарванымылан 25 ий теммылан пӧлеклалтше шарнымаш- концерт лиеш. Тудым ветеран- влакын «Боевое братство» Российысе мер ушемышт ямдыла. Концертыште десантник- влакын «Выбор» вокально- инструментал ансамбльышт, юнармеец- влак да молат шке усталыкыштым ончыктат. Тушко республикым вуйлатышын администрацийже, мэрий, силовой структурыла гыч уна- влакым ӱжмӧ. 15 шагатлан СОБР-ын сар-куралжым ончыктышо выставке почылтеш. А 11-ше декабрьыште «Выбор» ансамбль Солнечный посёлкысо тӱвыра пӧртыштӧ концертым ончыкта да посёлкысо школым тунем пытарыше, Чечняште вуйым пыштыше Олег Вершининлан мемориал оҥам почаш концерт жапыште оксам погаш палемдыме.