«Марий тиште кече форум» ятыр мероприятийым темла.

Марий тиште кече кумдан палемдалтшаш. Тудын кышкарыште кок кугу мероприятий лиеш. 6-шо декабрьыште Йошкар-Олаште «Марла чын возена» 7-ше тӱшка диктантым возат. Тушко кажне кумылан еҥ ушнен кертеш. Диктантым МаргУ-н тунемме да лабораторий корпусыштыжо, Кремль уремысе 44-ше пӧртыштӧ, Республикысе мер-политик рӱдерыште Гагарин проспектысе 8-ше пӧртыштӧ  возаш тӱҥалыт. Тиддеч посна марла чын возен моштымыштым Российысе моло кундемыштат да да йот эллаштат тергат. Вес кугу мероприятийже 10-шо декабрьыште «Марий тиште кече» форум лиеш. Тудо мер-политик рӱдерыште эрта. Тудын радамыште шочмо йылмым туныктышо- влак ассоциацийын кумдаҥдыме заседанийже, йыргешке ӱстел йыр каҥашымаш- влак, виш лекций, выставке, мастер-класс, усталык лабораторий, презентаций, модмаш, концерт да молат лийыт.