Йошкар-Олаште Герой- влакын аллейыштым ыштыме
Йошкар-Олаште Герой- влакын аллейыштым ыштыме. Сеҥымаш парк- тиде тӱшка кундем. Тудым тӱзаташ оласе калык 2018-ше ийыште эн шуко йӱкым пуэн ыле. Тудым тений пужен ыштымаш «Илыме вер да оласе кумдык» калыкле проект кышкарыште шукталтын. Тушто бордюрым ыштыме, асфальтым шарыме, брусчаткым оптымо, волгалтарыше тулым пуртымо, паркыш пурымо композиций- влакым ыштыме. У ий пайрем вашеш Сеҥымаш паркыште оксам тӱлыде ыштыше ий каток почылтеш. 2020-шо ийым Шарнымаш да Чап идалык семын увертарыме. Тидын вашеш паркым каныме вер да шарнымашым аралыше вер семын ышташ палемдыме. Кугу Ачамланде сарыште республике гыч 140 тӱжем утла еҥ кредалын. Тушечын 17 тӱжем утлаже- Йошкар-Ола гыч улыт. Нунын кокла гыч ятырже кӱкшӧ правительстве награде дене палемдалтын. Нуным ме шарнышаш улына. Тидлан кӧра Сеҥымаш Паркыште герой- влакын аллейыштым ыштыме. Тудо икмыняр кӱртньӧ стелым ушен шога. Кажныштыже Марий Эл гыч Совет Ушемын Геройжо, Чап орденын тичмаш кавалерже, Российын Геройжо- влакын лӱмыштым возымо. Адакшым Йошкар-Олан историй тоштержын шонымашыже почеш, герой- влакын лӱмыштым возыман табличкыште вераҥдыме куар код деке смартфоным лишемдымеке, геройын тичмаш биографийжым да подвигше нерген пален налаш лиеш. Кызыт тидын шотышто ямдылалтме паша кая. Проектым икмыняр тылзе гыч пашаш колтат.
