Республикым вуйлатыше Российысе Центросоюзым вуйлатыше-влак дене вашлийын

Таче правительстве пӧртыштӧ Марий Элым вуйлатыше Александр Евстифеев Российысе Центросоюзын правленийжым вуйлатыше Владислав Грибков дене вашлийын да ончыкылык вашкылым каҥашен. Тиде организаций элыштына потребитель кооперацийын пашажым виктара. Александр Евстифеевын мутшо почеш, республике ял озанлык сатум ятыр ыштен луктеш. Сандене вашкыл кугуракат лийын кертеш.  Тушто тыршыше пашаеҥ- влакын пашадарыштымат нӧлталаш кӱлеш. Владислав Грибков шке вашмутыштыжо каласен: ведомствышто ончык кайымаш шижалтеш. Тудо, тӱҥ шотышто, сатум налмаш да ужалкалымаш дене кылдалтын. Потребкооперацийын ик эн кӱлешан социал функцийже уло: тудын кевытше- влак эн тора яллаштат улыт. Тушко кугу бизнес миен ок шу. Кушто кевыт уке гын, тушко автолавке- влакым колта. Мемнан республикыште Марпотребсоюз организацийлаште кок тӱжемат 200 еҥ тырша. Тудо эн кӱлешан сатум ситарыме деч посна, калык деч ял озанлык продукцийым налеш да шке сатушкыжо савыра. Марпотребсюз системыште 335 кевыт пашам ышта. Тушечын 80 процентше яллаште верланен. Кодшо ийын 108-ыжым олмыктымо, 39 оборудованийым налме. Тений Российысе Центросоюз, Республикын Правительствыже да Марпотребсюз коклаште вашкыл шотышто кум шӧрынан соглашенийым пеҥгыдемдыме. Умбакыже вашла пайдале пашам ыштыме нерген кутырен келшыме.