Шушаш ий мучашлан пачер шотышто ондалалтше-влак илыме веран лийыт
Шушаш ийлан Марий Элыште шке оксам пыштен пачерым чоҥаш ушнен, ондалалтше- влак кодшаш огытыл. Кучемын полышыжлан кӧра, ондалалтше дольщик- влакын ресстрышкышт пуртымо еҥ- влак 2020-шо ий мучашлан вучымо пачерым налшаш улыт. Тыгай кӱлешан решений нерген Республикым вуйлатыше Александр Евстифеев правительствын совещанийыштыже ойлен. Йодыш моткоч кӱлешан,- каласен тудо. Паша тарванен, но тудым эре терген шогыман. Южо еҥже компенсацийым налнеже. Сандене графикым кузе шуктымым ончалаш кӱлеш, полыш кӱлеш але иктаж чарак уло- чыла рашемден лекман. Правительстве председательын икымше алмаштышыже Александр Сальников ушештарен: республикыште кызыт проблемныйлан шотлалтше кум пӧрт уло. Тушто дольщик- влакын пачерыштат верланен. Ик объектше «Гомзово» микрорайонысо 106 пачеран пӧрт. Тушто 22 ондалалтше еҥ шотлалтеш. 11-же окса компенсацийым налын. 11-тыже тиде пӧртыштӧ вес ийын пачерым налеш. Кокымшо пӧртшӧ Карл Маркс урем ден Революций площадьыште верланыше 148 пачеран пӧрт. Тушто чоҥымо паша кая. Пашам тений декабрьыште мучашлышаш улыт. Кумшо объектше Семёновка селаште, Молодёжный уремыште верланен. Туштат паша кая. Тудым 2020-шо ий мучашлан ыштен шуктышаш улыт. Тыге ондалалтше- влакын йодышышт кораҥдалтшаш.