«Калык участковыйын» лӱмжӧ пале лийын

«Калык участковый» Россий конкурсын регионысо йыжыҥже мучашлалтын. Тушто калыкын йӱклымашыже почеш, сеҥышылан Морко район гыч участковый Владимир Ландышевым шотлымо. Тудын верч кок тӱжем утла еҥ шке йӱкшым пуэн. А тӱжемат 500 утла йӱк дене кокымшо верыш Шернур пӧлка гыч Эдуард Якимов лектын. Козьмодемьянский пӧлкан 6-шо отделенийжын участковыйжо Андрей Трифонов кумшо лийын. Шке профессионал пайремже вашеш полицийын майоржо Владимир Ландышев Республикын чапшым Россий конкурсын финалыштыже аралаш тӱналеш. Тушто сеҥышаш верч элысе чыла кундемын представительже- влак кучедалыт. Владимир Олегович эл кӧргӧ пашаште 2000-ше ий гыч ышташ тӱналын. Тушечын куд ийже участковый улеш.