Йошкар-Олаште тунемше- влаклан лӱйкалыме рӱдер почылтын
Республикым вуйлатыше Александр Евстифеев Йошкар-Оласе 28-ше номеран лицейыште кызытсе жаплан келшыше лӱйкалыме рӱдерым почмаште лийын. Российын Президентше шушаш 2020-шо ийым Шарнымаш да Чап идалык семын увертарен. Элна Кугу Сеҥымашын лӱмгечыжым вашлияш тӱналеш. Сандене кугу вер самырык тукымым патриотизм шӱлышеш шуарымылан ойыралтеш. Республикым вуйлатышын кӱштымыж почеш, тиде йодыш деке Марий Элыштат кугу тӱткышым ойырат. Патриотизм шӱлыш дене пырля спорт да таза илыш йӱла деке шӱмаҥдыме сомылат шукталтеш. Тидлан кӧра Йошкар-Ола кучем дене спорт министерствын еҥышт 28-ше лицей негызеш у лӱйкалыме тирым почаш кугу пашам шуктеныт. Республикыштына тыгай спорт вияҥеш- пуля дене лӱйкалымаш. Ожно мемнан деке эсогыл всесоюзный тренировко сборышкат толеденыт. А кызыт тунемше- влак тыгай таҥасымашлашке шке кӱшеш коштыт: оружият, ӱзгарат огыт сите. Сандене тиде чырым кораҥдаш лийме. Бюджет тирым ышташ 920 тӱжем теҥгем ойырен. Тыге лицейын пӧртйымал пачашыштыже стрелковый галерей, тунемме класс, лӱйкалаш шогалме вер, пычалым аралыме вер ышталтын, стрелковый комплексым, электрон тренажёрым да оружийым налме. Лӱйкалыме рӱдерым почмаш тиде спорт деке йоча- влакым кумылаҥдаш полша. Лач тыгай шонымашым каласен Республикым вуйлатыше. Тудын темлымыж почеш тыгай рӱдер- влак кажне районышто лийшаш улыт.
