«Шӧртньӧ шыже» выставке гыч Марий Эл 30 медаль дене пӧртылын
9-ше гыч 12-шо октябрь марте Москосо ВДНХ кундемыште Россий кӱкшытан 21-ше «Шӧртньӧ шыже» агропромышленный выставке пашам ыштыш. Ныл кече жапыште ончер радамыште кугу деловой программе лийын. Конференц-заллаште 50 утла мероприятий эртен. Марий Элын делегацийжым республикысе ял озанлык министр Александр Гречихо вуйлатен. Делегаций чыла гаяк кугу мероприятийлаште участвоватлен. Ончерын ик эн тӱҥ ужашыжлан шумо сеҥымашым ончыктышо экспозиций шотлалтын. Тушко регионласе эн сай продукцийлам чумырымо. Марий Элын экспозицийышкыже 20 утла вӱдышӧ предприятий сатужым луктын. Тушко Российын ял озанлык министрже Дмитрий Патрушеват толын каен. Предприятий ден организаций- влак тӱрлӧ номинацийыште кӱкшӧ награде дене палемдалтыныт. «Шӧртньӧ» медальым «Звениговский» шылкомбинатын кок тӱрлӧ колбасаже, Шернур сырзаводын кум тӱрлӧ сырже, торыкшо, йӱышыжӧ, «Солюд» ушемын сгущенкыжо, йогуртшо, ӱмбалже, Йошкар-Оласе хладокомбинатын кылмыктыме турнявӧчыжшӧ, «Чай Руси» ушемын кум тӱрлӧ чайже, «Яндар» ушемын ик чайже палемдалтыныт. Ший медальым «Звениговский» шыл комбинатын вич тӱрлӧ колбасаже сеҥен налын. Той медальым икымше кинде заводын кукуруз ложаш гыч ыштыме киндыже, «Крафт» ушемын шоколадше, Советский райпон томат соусшо налыныт. Шӧртньӧ медальым вольык озанлыкыште шумо сеҥымашлан «Лукоз» предприятийлан пуымо. Тыгак Медведево район ден Пекшиксола администраций ял кундемым тӱзатымылан шӧртньӧ медальым налыныт, Казанский ял илем администраций тауштымаш дене палемдалтын. Тыгак эше икмыняр предприятий ден тӧнеж той медалян лийын. Тичмаш аклымаште Марий Эл тиде гана выставке гыч 30 медальым конден: 18-ыже шӧртньӧ, 6-шо ший да 6-шо той медаль- влак.
