Чодыраште тул пижын кертме тургым мучашлалтын
Йӱран да юалге игече толмо дене республикысе чодыраште пожар лӱдыкшӧ тургым мучашлалтын. Пӱртӱс поянлык министерствын ончыктымыж почеш, тений шошо гыч шыже марте чодыраште 42 гана тул пижын да 59 утла гектар кожлалан эҥгекым конден. Ӱмаште 46 гана тул пижын ыле. Тений 29 чодыра пожар тул дене шекланыде пайдаланымылан кӧра лийын, 13-шылан волгенче амалым ыштен. Тиде тургымышто 18 лесничестве гыч 11-тыштыже да «Марий чодыра» паркыште чодыра йӱлен. Туллан кугун шарлаш эрыкым пуымо огыл. Тудым шке жапыштыже «Авиалесоохранын» еҥышт да арендатор- влак йӧртеныт.
