Шушаш ийын оласе калык могай кумдыкым тӱзаташ темла?

Йошкар-Ола администрацийыш калыкле проект кышкарыште 2020-шо ийыште тӱшка кумдыклам тӱзатыме шотышто темлымаш- влак умбакыже пурат. Эн шуко темлымашыже тротуар- влакым олмыктымо дене кылдалтыныт. Мутлан, Карл Либкнехт уремыште, Красноармейский уремыште 9-ше микрорайон могырыш, Йыван Кырля уремын кок велыштыжат, Фестивальный да Анников уремлаште, Эшпай ден Кремль уремлан нечётный могырыштышт тротуратым олмыкташ йодыт. Тыгак рӱдӧ пляжым, эҥер серым, Тарханово паркым тӱзландараш темлымаш- влак улыт. Калык посна кудывече- влакымат ок мондо. Но кызыт тӱшка кумдык шотышто темлымаш- влакым погат. Нуным 31-ше октябрь марте пуаш лиеш. Серыш дене темлымашым ола администрацийыш пуыман. Тыгак электрон йӧн денат колташ лиеш. Чыла темлымашлан вара рейтинг йӱклымаш лиеш.