Александр Евстифеев Марий Эл Кугыжаныш Погынын комитетлажым вуйлатыше- влак дене вашлийын
Республикым вуйлатыше Александр Евстифеев Марий Эл Кугыжаныш Погынын комитетлажым вуйлатыше- влак дене ончыкылык пашам каҥашен. Социал вияҥмаш комитетым вуйлатыше Александр Карташов палемден: паша палыме, йодыш- влак кугу улыт гынат, ончыкылык задачым кузе шуктышашым умылымаш уло. Комитетым чумырымо. Шонымаш тӱрлӧ лектеш гынат, пырля пашам ышташ оҥай лиеш, - каласен Карташов. Тазалыкаралтыш, тӱвыра да спорт комитетым вуйлатыше Евгений Кузьмин дене мутланышыла, Александр Евстифеев ушештарен: республикын бюджетшын 60 утла процентше социал корныш виктаралтын. Тендан серьёзный комитет. Тазалыкаралтыш, демографий дене калыкле проект- влак улыт. Правительство тыгак тазалыкаралтыш йодыш дене пашам ышта. Кызыт тиде- перинатал рӱдер, Козьмодемьянскыште поликлиникым чоҥен пытарымаш, Волжск олаште азам ыштыме пӧртым чоҥымо пашам писештарымаш. Тӱвыра да спорт тыгак кӱлешан паша, - каласен республикым вуйлатыше. Комитетын пашаже тӱрлӧ йодышым авалта, - палемден Евгений Кузьмин. Тӱвыра сымыктышым гына огыл, калыкле политикымат ушен шога. Ме тӱрлӧ калык илыман кундемыште улына. Республикына 100 ияш лӱмгечыжым вашлияш ямдылалтеш. Правительствын да калыкын темлыме задаче- влакым каҥашаш да кӱлешан решенийым лукташ тӱналына. Комитетын составше куандарыш: оҥай да уста еҥ- влак чумыргеныт. Лектыш дене пашам ышташ тӱналына, - ӱшандарен ойлен тазалыкаралтыш, тӱвыра да спорт комитетым вуйлатыше. Александр Евстифеев тидымат ешарен: исполнительный да законодательный кучем- влак ончылно икгай задаче шога- республикысе калыкын улан да йӧнан илышыже. Тушкак калыкле проект- влакат виктаралтыныт. Сандене комитет вуйлатыше- влакым чаткан, сай лектыш дене пашам ышташ ӱжын ойлен.
