«Паллада» парус клубын тыршымыжым правительстве кӱкшытыштӧ палемденыт

Теҥгече Правительстве пӧртыштӧ «Паллада» парус клубын воспитанникше- влаклан шарнымашан медальым да Марий Элын тистыжым кучыктымо торжественный мероприятий лийын. Марий Элым вуйлатыше Александр Евстифеевын лӱмжӧ дене самырык моряк- влакым Республикысе правительстве председательын икымше алмаштышыже Сергей Сметанин саламлен. Тудо палемден: кызыт республикыште самырык тукымым военно- патриотизм шӱлышеш шуарыме йодышлан кугу тӱткыш ойыралтеш. 150 утла военно-патриот ушем ден отряд пашам ыштат. Тушко вич тӱжем утла йоча коштеш. Тиде корнын кӱлешан ужашыжлан йоча- влакын теҥыз пашашт шотлалтеш. Тиде толкын Козьмодемьянск олаште шочын да чолган вияҥ толеш. Тудо тыгак ешарен: «Паллада» парус клубыш коштшо рвезе- влак нелылыкым сеҥен лекме сай опытым погеныт. Пеш самырык улыда гынат, шке самандан геройышкыжо савырненда. Молан манаш гын, тергымашым эртенда, кужу походлашке коштында, Республикын чапшым араленда. Ӱшанем: «Паллада» Россий флотын ончыкылык ӱшанле еҥже- влакым кушта, - каласен Сергей Сметанин. Тудо самырык моряк- влаклан тауштен да «Военный парадын участникше» шарнымашан медальым юнго- влак Иван Воронов, Кирилл Матвеев, Артём Кирпичников, Максим Яндыковлан кучыктен. «Изи годсек Родинылан служитлымылан. Нахимов П.» шарнымашан медальым Артём Желудкин, Максим Мучкин, Иван Сергеев ден Лев Утятин налыныт. Сергей Сметанин тыгак «Паллада»  парусан тунемме судно дене тӱня йыр иймашке кайышаш Роман Михеевлан Марий Элын Кугыжаныш тистыжым да рокым пыштыман чондайым кучыктен. Вашеш шомакыште клубын воспитанникше Артём Желудкин нунын пашаштым тыге аклымылан тауштен ойлен да да ончыкыжымат ӱшаным сулаш сӧрен.