Республикысе спорт федераций- влак 43 сборный командым погеныт

Октябрь кыдаллан спортын тӱрлӧ видше дене республикысе федераций- влак сборный команде- влакын 43 спискыштым ыштеныт. Тушечын 40-же кеҥежымсе спорт дене, кумытшо- телымсе. Тидын нерген спорт-туризм министр Лидия Батюкова мер организацийлам вуйлатыше- влак дене вашлиймаште увертарен. Спискым ыштымаш федераций- влакын обязанностьышкышт пура. Марий Элын сборный командышкыже пуртымо спортсмен гына таҥасымашлашке республикын бюджетше кӱшеш командировкыш каен кертеш. Тыгак врачебно- физкультурный диспансерыште тичмаш медосмотрым эрташ праван лиеш. 43 сборный команде гыч 20-жо спортын олимпий видше дене улыт, 21-тыже олимпий огыл, кокытшо инвалид да начар тазалыкан- влакын командышт. Таче кечылан эше 10 вид дене сборныйым чумырымо огыл. Тиде- айкидо, бадминтон, бильярд, кӧрэш, ӱштӧ дене кучедалмаш, имне спорт, кендо, кол кучымаш, теннис да фигурнын мунчалтымаш дене. 43 сборный командын радамышкыже тӱжемат 928 еҥ пура. Спорт школлаште вич тӱжем наре еҥ шуаралтеш. Республикысе спорт-туризм министерствыште тыгак Российысе сборный командылаш пурышо спортсмен- влакын чотыштым увертареныт. Чылаже Российысе сборныйлаште республике гыч 97 еҥ шотлалтеш. Тушечын 89-ыже спортсмен да 8-ыже тренер ден специалист- влак. Кодшо ийын 69 лийын, 17-ше ийыште 51 спортсмен. 89 спортсмен гыч, 14-ше спортын олимпий видше дене, 53 олимпий огыл, 22-шо инвалид да начар тазалыкан- влак. Нунын кокла гыч тӱнямбал классан спорт мастер лӱмым 4-ын нумалыт, спорт мастер 14 еҥ, спорт мастерыш кандидат 27, икымше разрядан 35, кокымшо- 8, кумшо спорт разрядан ик еҥ улыт. 22 еҥ спорт ямдылалтмаш рӱдерын пашаеҥжылан шотлалтыт да пашадарым налыт.