Марий Элым вуйлатыше тазалыкаралтыш организаций да эмгудо- влаклан медицина маскым ситараш кӱштен
Марий Элым вуйлатыше тазалыкаралтыш организаций да эмгудо- влаклан медицина маскым ситараш кӱштен. Тыгай задачым Александр Евстифеев коронавирус инфекций шарлымым шижтарыме шотышто оперативный штабын заседанийыштыже шынден. Марий эл Правительстве председательын алмыштышыже Илга Дравниеце увертарен: республикыш икымше тӱшка 82 тӱжем маске толын. Тиддеч посна кызыт эше 196 тӱжем маскым кондаш ойпидыш ышталтеш. Республикым вуйлатыше эн ончыч маскым медицина тӧнеж, эмгудо да кочкыш сатум ыштен лукшо организаций- влаклан ситараш кӱштен. Тӱҥ задаче- кочкыш сатум лукшо предприятий- влак производство кугытым ынышт иземде. Аптекылаштат маске лийшаш, тудым калык налын кертше. Кокымшо партий гыч чыла аптекылан маскым ситарыман, - пеҥгыдын каласен Александр Евстифеев. Илга Дравниецен мутшо почеш, черланыше кок ӱдырамашын тазалыкышт лӱдыкшым ок лук. Инфекций шотышто тергалташ кумылан- влакын ешаралтмыштлан кӧра анализым ынде икымше да нылымше поликлиникыштат налыт. Коронавирус инфекциян пациент- влаклан полышым 6 медицина организацийыште пуэн кертыт. Ешартыш койко фондым ышташ 94 миллион теҥгем ойырымо. Роспотребнадзор виктемым вуйлатыше Светлана Булатова увертарен: инфекций шарлыман кундемла гыч толшо- влакын спискышт кажне кечын пурен шога. Нуным медицина организацийлашке лабораторий шымлымашым эртараш да эскераш колтат. Черланыше кок еҥ шотышто нунын дене ваш лийше чыла еҥым рашемдыме да пунчалым кучыктен, мӧҥгыштышт шинчаш ыштыме. Шке пашаштым чарышаш предприятийламат тергат, икмыняр нарушенийым рашемдыме. Александр Евстифеев тиде пашам умбакыжат шуяш кӱштен.