Российын ял озанлык министрже социал кӱлешан ял озанлык продукцийым ситарыме йодыш дене заседанийжым эртарен

Теҥгече Российын ял озанлык министрже Дмитрий Патрушев социал кӱлешан ял озанлык продукцийым да кочкыш сату шотышто мониторингым эртарыме оперативный штабын заседанийжым видеоконференц йӧн дене эртарен. Заседанийыште республикысе ял озанлык министр Александр Гречихо, кучем органын да агропромышленный комплексын еҥышт участвоваталеныт. Министрын мутшо почеш, кочкыш сату да тудлан ак шотышто лӱдыкшӧ уке. Чылажат жапыштыже ситен шогыжо манын, южо пырчан культурым йотэлыш колтымо квотым пеҥгыдемдыме. Ужалымашке ешартыш сатум лукташ ямдылалтмаш тӱналын. Тидыже  кочкаш да вольыклан пукшаш пырчым ситараш, акым иземдаш да кочкыш сатулан акын вашталт шогымыжым чараш полша. Дмитрий Патрушев палемден: тӱҥ задаче- калыклан кӱлеш наре сатум ситарымаш да шошо ага пашам жапыштыже да сайын эртарен колтымаш. АПК предприятий- влаклан жапыштыже дезинфекцийым эртараш, пашаеҥ- влаклан аралыше средствым ситараш темлыме.