Марий Элым вуйлатыше «Российын лидерже- влак» дене вашлийын

Марий Элым вуйлатыше Александр Евстифеев «Российын лидерже- влак» конкурсын участникше- влак дене вашлийын.  Правительстве пӧртыш поснак сай лектышым ончыктышо конкурсант- влакым ӱжмӧ. Эн ойыртемалтшыже, мутат уке, Ай-Ти индустрийын пашаеҥже Ирина Кугуелова лийын. Тений полуфиналыш Марий Эл гыч куд еҥ лектын кертын, а Российысе финалыш Ирина Кугуелова гына шуын. Александр Евстифеевын мутшо почеш, президент тиде конкурсым кӱкшын акла. Тиде ик гана эртарыме акций огыл да карьер тошкалтыш денат кылдыман огыл. Тиде оҥай да сай ончыкылыклан ӱшаным пуышо еҥ- влакым пален налмаш, а финалист- влак профессийыштышт да кугыжаныш кучемыштат кӱлеш лийыт. Конкурсыш ондак ушнышо 150 наре еҥ кугу вуйлатыме пашашке ушнен. «Российын лидерже- влак» конкурсыш Юл кундем округ гыч гына 41 тӱжем йодмаш пурен. Республике гыч участник- влакат сай лектышым ончыктеныт. Ирина Кугуелова каласен: финалыш лекмым пален налмеке, куаным огыл, а кугу ответственностьым шижынам. Тиде конкурс ончыкылыклан кугу ӱшаным пуа, - манын. Вашлиймашыштак у шонымаш шочын: Марий Элыште эртарыме тыгай компетенций конкурсын кышкаржым кумдаҥдаш кӱлеш. Тушко самырык- влакым гына огыл, опытанрак еҥ- влакымат ушыман. Республикым вуйлатыше тыгай шонымаш дене келшен. А Российысе конкурсын 300 суперфиналистше шинчымашым нӧлташ ик миллион теҥге гыч грантым налыт да вуйлатыше кадр резервыш пурен кертыт.